Сурет: Ақорда
Президент Қасым-Жомарт Тоқаев Шанхайда өткен Дүниежүзілік жасанды интеллект жөніндегі конференция аясында Камбоджа Премьер-министрі Хун Манетпен кездесті.
Кездесу барысында Мемлекет басшысы Қазақстанның Камбоджамен достық пен өзара құрметке негізделген серіктестікті жоғары бағалайтынын айтты.
Президент екі ел арасындағы сауда-экономикалық ынтымақтастықты кеңейтуге мүмкіндік мол екенін атап өтті. Оның айтуынша, ауыл шаруашылығы, тоқыма өндірісі, туризм, құрылыс, тағам өнеркәсібі және көлік-логистика салалары өзара әріптестіктің негізгі бағыттарына айналуы мүмкін.
Қасым-Жомарт Тоқаев Қазақстанның Камбоджаға бидай, тыңайтқыш және басқа да ауыл шаруашылығы өнімдерінің экспортын ұлғайтуға дайын екенін жеткізді.
Сонымен қатар Мемлекет басшысы Қазақстанның цифрландыру саласындағы жетістіктеріне тоқталып, БҰҰ-ның электрондық үкіметті дамыту индексінде алғашқы 24 елдің қатарына кіретін Қазақстанның осы бағыттағы тәжірибесімен бөлісуге әзір екенін айтты.
