Өзбекстанның Науаи облысы Нұрата ауданында қазақ пен өзбек халықтарының тарихи байланысын айғақтайтын ерекше кешен орналасқан. Сәйітқұл ата мен Әйтеке би мемориалдық кешені – ғасырлар бойы жалғасқан рухани жақындық пен ортақ тарихтың символы. Мұнда қазақтың әйгілі биі, мемлекет қайраткері Әйтеке би Байбекұлы мен халық арасында әулие саналған Сәйітқұл атаның кесенелері бар.
Әйтеке би (1644–1700) – қазақ мемлекеттілігінің қалыптасу кезеңінде маңызды рөл атқарған тарихи тұлға. Кіші жүздің бас биі болған ол шешендігімен, әділдігімен және ел басқару ісіндегі көрегендігімен танылған. Сондай-ақ қазақтың дәстүрлі құқық жүйесіндегі «Жеті жарғыны» әзірлеуге қатысқан. Тарихи деректерге сәйкес, Әйтеке би өмірінің соңғы кезеңін Нұрата өңірінде өткізіп, осы жерде жерленген.

2009 жылы оның қабірінің үстіне алғашқы кесене тұрғызылып, 2012 жылы мемориалдық кешен толықтай ашылды. Бүгінде мұнда кесенелермен қатар мешіт, музей және зияратшыларға арналған қонақүй жұмыс істейді. Бұл орын тек тарихи тұлғаға тағзым ететін мекен емес, Қазақстан мен Өзбекстан арасындағы достық пен бауырластықты дәріптейтін ортақ мұра саналады.

